#C9通識科：點解水貨平咁多❓

有冇人同我一樣都係屋企嘅電器部主管呢？即係…成間屋所有會用到電嘅嘢，都係我負責買（同埋格價）～電視機、雪櫃、洗衣機、冷氣機、風扇、blablabla～當然，家母嗰部手機都係啦！佢唔鍾意用iPhone～要用Android機！近排用咗兩三年嘅舊機開始有問題…真係！！咁啱嚟緊又派消費券，係時候幫佢睇定部新手機啦～

買任何電器都係，好多時都會聽到「行貨」同「水貨」，究竟兩者有咩分別呢？水貨係咪假貨？會易壞啲？點解水貨會平啲？買行貨定水貨好啲？

【乜嘢係水貨❓】

簡單啲講，水貨就係…並非經生產商指定銷售代理所出售嘅貨品！所以，水貨其實唔係假貨！
但有可能係走私貨～好多人以為淨係手機先有水貨，其實唔只～仲包括電器、手機、電腦、汽車、服裝、玩具、手錶、香煙、奶粉等任何境外產品！

以手機為例，由原裝進口或者係鄰居地區（例如大陸）生產嘅手機，都會先將貨運集中喺香港，然後再發貨到其他亞洲地區／國家。而水貨就係呢個時候出現！有商家會喺非銷售代理嘅途徑拎到一啲貨，並私下出售圖利，所以就會出現水貨機，但其實又係真貨而非正貨！因為冇經過銷售代理同報稅，所以售價就會平啲喇～

【咁行貨又係乜嘢❓】

雖然行貨同水貨都係同一樣嘅貨，但其實都有分別！行貨係經過合法報關手續等正規渠道入口嘅境外商品！加上銷售代理會提供官方保養、維修等售後服務，消費者購買就會安心啲～價錢亦都相應高啲～

講多樣嘢俾大家知～就算係行貨，唔同舖頭、地區嘅價錢都會有分別！行貨原來仲有分「大」同「細」，即係「大舖」同「細舖」！以電器為例，豐澤、百老匯、蘇寧等呢啲就係大舖；深水埗黃金高登、旺角先達、或者係你屋企樓下嗰間電器舖就係細舖。大舖價錢通常都穩定啲同貴啲，因為大集團會大批入貨，所以同官方生產商協議好建議零售價，價錢就唔會隨意更改。而細舖就冇咁多規矩，有貨就賣～可以話係舖頭「自由定價」！所以你會見到就算大細舖一樣都係賣緊行貨，價錢都會有唔細嘅分別！

【咁買行貨定水貨好❓】

一句講晒！其實水貨都一樣用到，但如果你驚佢壞想要保養就買行貨啦！但我自己就會諗多一步，就係安全性問題！假如係買大型電器，我就會一定買行貨！始終行貨有官方保養，甚至乎出售前進行抽樣檢查，確保批貨冇問題先推出街賣，消費者購買時就會安心啲。

不過有某啲商品並冇香港本地官方認可嘅分銷商，有時想買正貨都冇辦法，咁就唯有買水貨啦～但有樣嘢要小心！水貨其實都有假貨風險，甚至乎俾啲無良商人換走原裝零件改以平價零件取代…所以要衡量過種種因素，認為貨品妥當先至好買呀～雖然C9佬買到平嘢就開心，但大家都要做個精明消費者呀！