#C9消費心理:清空購物車❗️點解咁難❓

今次想講下網購習慣!你有冇試過瀏覽購物網站,見到好多唔同嘅買,會好順手係咁將唔同嘅貨品加落購物車,但到最後…其實都係唔結帳!(舉手!我有!)而根據C9佬非正式統計,我喺office問咗十個同事,九個都話有呢個習慣!(仲有一個係冇信用卡唔會網購…)

喺2018年有一個針對全球24個市場嘅消費者調查,訪問咗2萬名網購用戶嘅消費習慣!其中一項就係問佢哋有冇購物車「棄車」(放棄結帳)嘅習慣。發現歐美地區之中,澳洲、歐洲、北美嘅顧客分別有57%、41%、47%人會「棄車」;而喺2019年,中國某電商平台有統計用戶數據,發現「棄車率」高達72.1%!仲發現男女佔比大約50:50,究竟點解我哋點解花咁多時間睇有咩啱買,最後都係會有放棄結帳呢個習慣呢?

【原因一:當購物車係收藏夾】

呢兩年我哋留多咗喺屋企,好多人都養成咗上網購物習慣。當見到有心水貨品時,未確定係咪真係買,就隨手加咗入購物車先。同類型貨品有幾個唔同牌子?加晒落去先啦~之後先再慢慢喺購物車比價,或者搜尋一下邊個牌子好、格下價咁!久而久之,購物車就會充滿咗好多未知買唔買嘅貨品啦!所以有啲大型購物網(例如 #HKTVMall)會有書籤功能,就係方便呢類型嘅顧客!(不過懶人應該唔多理~哈哈)

【原因二:運費】

好多時候我哋都係因為想買某一件嘅貨品,經過搜尋而進入購物網站!然後網站就會話你知「消費滿$300 #免運費」,睇完一輪搵到幾件啱心水,準備結帳時先發現…未到免運費嘅要求金額,而運費係要$80…OK~Fine!棄車逃走!實際感覺就類似喺超市揀完一車嘢,見到排隊嘅人多到…就係埋門一腳!一秒決定,放低架購物車,頭也不回,直奔出口!

【原因三:無限長 #冷靜期

唔少人網購買嘢都係因為一下子衝動!畀完錢就後悔!但購物車其實就俾到顧客一個無限長嘅冷靜期!理性嘅顧客見到個總消費金額「嘩!加加埋埋要5舊幾水!都係唔買喇!」所以有啲購物網好醒目,會設有部分商品 #限時優惠!(唔係嗰啲refresh完又由頭計過嘅假倒數…)以 #Amazon 為例,有時見到某啲特定商品,會要求顧客喺加入購物車後2小時內落單先可以有85折優惠!如果真係好想買嘅顧客就會拿拿臨搵埋想要嘅嘢即刻落單啦喂!

【原因四:虛擬 #WindowShopping

C9佬我就有個奇怪習慣,有時夜晚悶悶地冇出街,都會開個購物網出嚟「Window Shopping」,根本都唔係真係想買嘢~「睇咗當買咗!」所以最後成個購物車都係唔會買~哈哈!又或者其實係留意定啲遲啲可能會買嘅嘢,到有需要嘅時候就會記得喺個購物車度!不過到需要買時,價錢可能都已經唔同咗…咁就再揀過啦!