6大平台比併!邊個最好用?


🛒 #消費券2022

即將又有新一輪消費券!上一期你揀咗邊個平台?今次除咗有一路用開嘅八達通、Tap & Go、Alipay HK 支付寶、WeChay Pay之外,將會有新平台Payme、Boc Pay加入!究竟各個支付平台好唔好用?今日就同大家介紹唔同平台嘅使用方便程度,考慮轉用其他支付工具嘅你可以參考一下!

🔸最多人用:八達通🔸@octopushongkong
〈消費便利度〉🟠🟠🟠🟠⚪️
〈拎錢容易度〉🟠🟠⚪️⚪️⚪️

八達通都可以話係全港最方便嘅電子支付方式,就連去街市買餸都可以一嘟搞掂!用嗰下,係就係方便呀,但拎錢嗰下麻煩呢~$5000都要分開N次拎!最近小弟仲遇到個問題,就係母親大人去醫院覆診用八達通俾錢,佢以為自己係用緊消費券餘額。但我幫佢喺app度check先發現八達通已經冇晒錢,但消費券仲有成千蚊未用…即係話原來係冇扣到消費券啲錢!唔明?即係錢就扣咗,但唔係扣緊消費券!咁啲錢去咗邊?原來公營機構唔可以用消費券俾錢…但現場又冇任何告示…咁我要點先可以用埋消費券啲錢?就係自己增值再返先可以用囉…

🔸網購首選:Tap & Go🔸@tapngo.hk
〈消費便利度〉🟠🟠🟠🟠🟠
〈拎錢容易度〉🟠🟠🟠⚪️⚪️

其實正確啲講應該係Tap & Go虛擬信用卡,可以加落去Apple Pay/Google Pay度用!係第一次派發時死server之外,其實都冇咩問題!唔會好似八達通咁分幾次拎錢,一筆過落入你帳戶!不過都有少少麻煩,就係系統預設咗將舊錢平均分去MasterCard同UnionPay兩邊,當派完錢之後要login返個app將啲錢撥返去同一邊!小弟就習慣用MasterCard,只要將加咗落手機Apple Pay/Google Pay,同平時簽卡一樣咁用!最方便係網購或者係大額消費!

🔸電子錢包:Alipay HK 支付寶、WeChay Pay🔸 @alipayhk@wechatpayhk
〈消費便利度〉🟠🟠⚪️⚪️⚪️
〈拎錢容易度〉🟠🟠🟠🟠🟠

小弟就唔係太習慣每次俾錢都要拎個手機出嚟搵個支付app再開個QR Code出嚟俾人嘟收錢…但呢2個平台就有度好,就係冇乜嘢需要用家額外做,消費券幾錢就直接過晒俾你!不過小弟就覺得最重要都係日常便利度~所以冇用佢哋…

之後就同大家預計一下,即將加入嘅新平台Payme同Boc Pay會點用法啦!

🔸過數首選:Payme🔸 @hsbc_hk
〈消費便利度〉🟠🟠⚪️⚪️⚪️

同朋友食飯夾錢用Payme的確方便!但喺商戶消費你又試過未?估計都會係用支付寶模式相似,就係會分開一個獨立錢包處理消費券金額!即係話要…「每次俾錢都要拎個手機出嚟搵個支付app再開個QR Code出嚟俾人嘟收錢…」我就麻麻地~但有另一個問題,就係平台穩定度!Payme間中會同商戶合作推出優惠,之前就試過用7仔便利店合作,不過去到優惠期最後兩個星期時就死server,當時全港7仔都用唔到Payme…(唔知係真死定詐死呢~haha!)

🔸較冷門:Boc Pay🔸
〈消費便利度〉🟠⚪️⚪️⚪️⚪️

即係中銀版嘅Payme!唔知有幾多人用過呢?小弟就冇用過,所以評論唔到…睇介面都係同Payme相似!不過支援Boc Pay商戶又好似唔多,普及程度較其他5個平台遜色!

以上就係最新一輪消費券平台嘅小小分享!
唔知到時會唔會更多優惠吸引大家轉用新平台呢?
有競爭有進步!最後得益嘅都係我哋消費者!(著數GET!)
大家又考慮成點?會用邊個平台?歡迎留言一齊討論下!