父親日＝打劫日？小心墜入商家陷阱

話咁快就過咗父親節喇！各位孝子賢孫有冇買禮物送俾爸爸呢？

大家呢幾日喺挑選禮物俾爸爸嘅時候，有冇發覺街上網有唔少嘅舖頭都做緊父親節促銷呢？

電器舖、運動用品舖、服裝店，呢啲舖頭做減價促銷，呢啲小叮都覺得冇咩特別～

但就連傳統美妝品牌Sasa都做父親節專屬優惠，呢吓令小叮有啲愕然！

到底父親節有啲咩魔力，搞到一眾行銷人或者一眾腦細好似著咗魔咁，
就連一啲傳統上同男性關聯不太大嘅行業都要跟住一齊搞促銷呢？

首先，小叮唔講咩行銷理論或者消費心理學俾你聽住～
先講啲好爆嘅數字俾你聽先～

根據National Retail Federation調查顯示，2021年美國消費者喺慶祝父親節嘅總開銷已經超過咗20億！

（20億即係幾多？即係小叮唔食唔訓唔搭車咩錢都唔使，幫公司打足111111年工先會有嘅錢呀！痴線！）

調查仲發現，過去10年美國人喺父親節嘅消費總額增長咗60%！（為美國父親抹眼淚！仔女越嚟越肯買嘢孝順老豆喇！）

單單係一個父親節，就為商家帶嚟20億生意呀！我係腦細，一定會心諗分到呢20億裏面嘅百分一我都發達啦！

仲唔拿拿臨叫班Marketing諗諗計，幫手喺呢個父親節消費市場分一杯羹咩！

所以呢，經過咁多年嚟商家嘅推波助瀾，孝子賢孫努力消費嘅情況下，塑造咗一個好適合俾商家打劫一眾孝子賢孫嘅機會！

一啲以往冇加入父親節促銷行列嘅商店，都逐漸加入父親節促銷嘅行列！

唔少嘅消費者（以小叮為例），其實我哋唔係間歇性嘅孝子賢孫，明明就平時都好孝順嘅！

只係總係覺得每逢大時大節，啲商品嘅折扣一定會係最大最吸引嘅！所以咪將平時已經諗住買俾爸爸嘅東西，等到父親節先買囉～

咁既然本身每逢父親節都一定會有一班孝子賢孫會買嘢送俾爸爸，咁作為商家嘅咪俾少少甜頭你，做個父親節期間限定優惠囉！等我哋呢班孝子急起上嚟！

咁當然有邊個明明見到件貨可以用平啲價格去買，會特登唔買，走去等佢變返正價先買㗎！

所以，商家一搞期間限定優惠，我哋成班孝子咪淪陷曬囉！

為咗唔好錯過個限時優惠，我哋會將一啲原本仲係考慮緊係咪有必要買俾爸爸嘅東西，即刻暫停思考，買咗先講！

不過小叮都明白，如果就咁講商家拋磚引玉，搞個限時優惠，所以搞到我哋成班孝子頓失理性，走咗去衝動消費，成件事好似好唔supportive，搞到好似我鳩up緊咁，所以我決定講啲theory去support我嘅講法～

消費心理學入面有六大原則嘅，而其中一個原則就係「互惠原則」，意思即係商家會釋出少少善意，搞個父親節限定優惠，咁消費者又會因為商家嘅善意，要微調咗自己嘅消費心態，增加咗自己嘅購物意欲！

另外，由於呢個「父親節期間限定優惠」，本身係一個具時限性嘅優惠，限時嘅優惠造就咗個優惠嘅稀有性。而根據馬斯洛嘅需求理論，人類對資源短缺嘅人事物總係充滿恐懼。所以當消費者見到個優惠咁稀有嘅時候，就會開始慌喇，慌亂之間就走咗去攞件商品去俾錢喇！

其實仲有啲行銷人會認為，有部分人喺父親節期間買禮物消費，係為咗打卡為咗幫自己塑造一個孝順形象。但呢個point比較具爭議性，而且比較negative，所以小叮不願喺度多作解說～

Anyway，大家依家應該明白點解咁多人會選擇喺父親節消費，或者點解咁多商家會喺父親節搞優惠吧！

就係因為過往數據都顯示消費者喺父親節嘅消費力都好強，商家咪減少少價，做個限時優惠出嚟，誘發你對稀有性嘅恐懼，從而誘發你更願意咁打開個銀包，俾班商家喺你銀包度攞錢囉～

今次嘅父親節行銷文章講到呢度，原本小叮打算打個小短文同大家分享，但打吓打吓又變咗千字文……

父親日＝打劫日？ 小心墜入商家陷阱