由賣火柴直到賣傢具嘅IKEA

IKEA喺《世界品牌500強》嘅排行榜入邊排行第38位，總有422間門市，對於呢個品牌可以話係無人不知，但關於呢個品牌嘅成長你哋又知幾多呢？

其實IKEA嘅始創人Ingvar Kamprad原本係賣火柴，佢出生於瑞典南部嘅一個村莊裏面，係全個瑞典最窮困嘅地區，所以佢由細到大都好渴望脫貧同有所成就。

喺佢五歲嗰陣就已經好有生意頭腦，知道自己家鄉根本冇商店，而屋企附近嘅家庭火柴需求好大，就問親戚借咗少少錢，買咗一盒火柴再用雙倍嘅價錢賣俾當地嘅農民，就係咁賺咗佢嘅第一桶金。

當佢意識到呢個搵錢嘅方法係可行嘅時候，佢又陸續向批發商買入火柴聖誕節嘅色物轉賣比農民，腦筋再一轉，佢整咗本郵購目錄，專賣各式各樣嘅日用品，郵購生意正式喺佢高中嘅時候開始，佢並冇因為「小生意」而荒廢學業，因為成績優異，爸爸俾咗一筆錢佢作為獎勵，就係咁，佢喺1943年就用果筆錢成立咗佢嘅第一間公司，命名為「IKEA」。

初時IKEA只係賣各類日常生活用品，顧客主要係為農民，為咗擴大業務，喺1947年，喺《農民郵報》落咗第一個廣告，銷量就極速增長啦！瑞典當時經濟發展迅速，市民對屋嘅需求上升，亦都因為呢個原因需要平嘅裝修，就係因為呢個因素，Ingvar Kamprad將公司轉型為家具行業。

去到1951年，IKEA喺家具市場已經有一定嘅穩定性，所以創辦人Ingvar Kamprad決定停止生產其他產品，專注家具市場。佢嘅第一間門市就係喺阿姆霍特（1958），建築規模達至6700平方米，當時嚟講，係成個北歐最大嘅家具商場。

Logo由來

IKEA嘅第一個logo係1951年面世，係一個紅色嘅印章，採用火漆印嘅元素，呢個概念係基於IKEA當時嘅郵購服務，世界各地都可以透過郵寄獲得家具。而呢個logo就係寓意郵購特色， 家具可以郵寄到世界各地。

Logo經過演變，最後先變為現時呢個藍黃logo，以瑞典國旗顏色元素為主。簡易嘅設計唔單止貼合IKEA嘅家具風格，仲令人有一種溫暖嘅感覺。

「浪費資源是一種滔天大罪」-Ingvar Kamprad

億萬富翁Ingvar Kamprad所創立嘅品牌無人不知，事業有成嘅佢生性節儉，幾乎所有衫服都購自跳蚤市場，打扮同生活都極低調，因為佢明白節儉可帶財，錢可以洗，但要用喺值得用同回到本嘅地方，節儉就係佢成功嘅哲學。