平嘢無好？點解有人鍾意買貴嘢？

趁第六波未殺到，防疫措施未收緊之際，諗住拿拿臨約班舊同學食個飯聚舊！當大家喺群組傾食咩時，有人就話不如食返以前讀書時成日食嗰間餐廳啦～又平又好食！不過其中一位同學就即刻反對，佢話：「梗係食好啲啦！大家都出晒社會做嘢，有錢唔駛食以前啲cheap嘢啦！」…突然令我思考到一個問題！點解會有人唔鍾意平價嘢呢？平嘢就一定差？

無可否認！雖然我C9佬好鍾意慳家，但都會有買貴嘢嘅時候！就好似買雞蛋咁，我都唔會貪平買$1隻嘅蛋，而會揀貴一倍多嘅日本蛋！問題嚟喇～點解我哋有時就算有平嘢，都會選擇買貴嘢呢？原來人會被貴價貨吸引，而對平價貨有偏見，喺心理上同歷史上都係有解釋。

對於點解有人拒絕接受平價嘢，因為呢類人總係會將價錢同質素之間畫上等號，呢啲根深蒂固嘅思想會令人唔識欣賞、忽視對低成本但真正有價值嘅事物。而當見到貴價貨時會感到興奮，能夠擁有呢件貴價貨就需要付出更多，自己先配得上擁有貴價貨。咁要付出幾多？最客觀可以衡量嘅當然就係錢啦！今次就同大家講一個關於菠蘿嘅故事！

一講到菠蘿，你會諗到又平又好食～但你又有冇諗過歷史上，菠蘿並非平民食得起嘅高價美食？當年哥倫布將菠蘿從美洲帶返去歐洲嘅時候，因為呢種生果極難運輸而且種植成本好高，所以只有皇室成員先食得起！計一計數，當年一個菠蘿嘅價錢就相當於今日5,000英鎊！（換算返港幣大約$47,500！）今日嘅我哋會話「差唔多5皮嘢一個菠蘿？冇嘢下話？」咪住先～當年嘅皇室成員就係覺得菠蘿值咁貴！只要有菠蘿食～幾貴都畀！仲尊敬到為菠蘿起咗間寺廟添～今時唔同往日，但菠蘿一樣咁香咁好味，而價錢就足足平咗1600倍！唔駛$30就有交易啦！如果要你買一個$50,000嘅菠蘿？除非食咗有超能力啦！

所以平嘢係咪就等於品質差劣？其實未必！只係人普遍對平嘢所產生嘅興奮度都好低好低…一樣嘢係平定貴，完全係取決於你對嗰樣產品嘅態度，簡單啲講就你覺得值唔值！就算買隻雞蛋，你都可能會想食得好啲所以買貴啲嘅日本蛋，但亦有人覺得$1隻雞蛋其實都好食。

講返餐同學聚舊飯最後揀食咩？貴定平？食菠蘿定食蛋？其實…唔重要啦～因為我中咗招…要隔離…又要再約過啦…食咩到時再傾過啦…（哭～🥲）不過其實食咩都好，價值唔係餐飯嘅價錢，而係大家見個面吖嘛！