解決「黃牛」?其實好簡單!🐮

追星,從前只是一個代表著少女青蔥歲月的其中一個詞語。 可是近...

今年過咗3-4月第五波之後,政府一放寬防疫規例 #ViuTV 即刻搞返個 #ChillClub 頒獎禮,非常成功!之後陸陸續續更多歌手(或者唱片公司)都好好把握機會決定開演唱會~下個月開show?今個月賣飛!比著以往早成幾個月,甚至半年開始賣飛真係唔同晒,大熱歌手場場爆滿!#Mirror#張敬軒#JayFung 等歌手一票難求!今個星期 #林家謙 同 #周國賢 仲要揀正同一日開始賣飛,唔知你有冇一齊搶飛呢?又搶唔搶到先?

門票價格係幾多都好,好多人為咗支持偶像,$680、$980、$1280,甚至乎$5000、$10000都有人買,價錢並唔係問題!但有一個問題存在已久,就係「#黃牛黨」。

🐂【「黃牛」係乜嘢?】

「黃牛」即係以高價方式二手轉售而從中獲利,售價通常都會比正常票價追好多倍,甚至去到不合理嘅地步。就好似Mirror第一次紅館演唱會咁,原價$1280嘅門票被炒至4百幾萬!(「唔係話實名制咩?點解仲會有黃牛?」呢個point稍後再講。)

🐂【黃牛搵食,犯法㗎?】

係呀!賣黃牛嘅人真係犯法!但點解仲有咁多人炒賣黃牛呢?我哋就睇下香港關於黃牛嘅法例,喺1941年制定,但其實當時都係針對街頭炒賣黃牛活動:

《公眾娛樂場所條例》(第172章) 第6b(2)條,任何人以”超過東主、管理人或籌辦人所定的款額的票價”,售賣、兜售或游說他人購買在獲發牌場所舉辦的節目的門票,即屬犯罪。 售賣門票的人如觸犯該條文,可處罰款2,000港元,

係呀,咁多年嚟都只係罰$2000咋!1950年以嚟一直冇變過。咁耐嚟有冇執法記錄呢?政府說法係:「並無已知的相關執法紀錄」!但搵下新聞就發現,最近一次關於黃牛嘅拘捕行動係2018年12月劉德華演唱會,當時拘捕咗11個中國人!之後…就冇喇~

🐂【點解黃牛咁易買到飛?】

以前未興上網買飛,仲要喺 #通利琴行 排通宵買飛嘅時代,就會見到一街都係 #排隊黨。而家?上網買飛啦!黃牛黨會出動搶飛電腦程式令佢哋「排快隊」,更容易入到購票網站買飛,我哋呢啲乖寶寶真係靠自己人手入網站嘅,又點會夠電腦快同「多人」吖!

🐂【香港點對付黃牛?】

其實…如果單靠香港而家個售票系統又真係冇辦法…而家無論係 #城市電腦售票網 定係 #快達票 網站,個售票系統都係用分流方式對付買飛嘅人潮。即係…好多人湧入嚟買飛咩?咪阻住你哋班人排隊排耐啲囉,純粹麻煩咗一啲真正想買飛嘅人,用電腦程式買飛嘅黃牛驚都未驚過。結果都係睇你彩數…買到就恭喜你啦!

🐂【#實名制 就解決到黃牛?】

你可能會問,Mirror唔係話實名制買飛咩?er…係嘅…佢話係實名制囉…公開發售嗰啲!但你睇到個座位表都知大部份都係 #贊助商 同埋 #內部認購 嘅飛,而呢啲飛係唔需要實名制購買嘅,結果反而係內部人士造成一啲黃牛飛!

最近 #TysonYoshi 就用真正嘅實名制去處理!係連內部認購嘅飛都要實名制,買飛時要入名,入場時要對名,錯一個字都唔入得!Tyson Yoshi都承認咁樣做其實個處理成本會增加好多!亦有人擔心實名制呢個方式會衍生到私隱問題,要真正想睇show嘅人買到飛係咪就要咁?

🐂【荷蘭式拍賣又work唔work?】

之前 #試當真 一周年現場版就用類似「#荷蘭式拍賣」減價式賣飛,即係票價由$10000開始,每日降價,直至賣晒所有飛,最後票價全部由觀眾決定。有人第一日就用$10000去買飛,去到最後$800嘅飛都全部搶晒!計返個票價其實仲貴過 #紅館!而試當真就話想嘗試用呢個方式對抗黃牛,睇嚟都幾成功!但結果搞到好多好想入場嘅人都因為唔係目標門票價格而買唔到飛,所以當時呢個售票方式都惹來一啲爭議。

🐂【現時最有效解決黃牛嘅方法】

聽落好似廢話,其實真係咁樣做先得!就係唔好買黃牛!你越買,黃牛越猖狂,就越阻止唔到!所以我哋都係忍一忍手啦!祝大家搶飛順利!

追星,從前只是一個代表著少女青蔥歲月的其中一個詞語。 可是近...